އަރިއަތޮޅު އުތުރުބުރީގެ ހަތަރުރަށަކަށް ޒިޔާރަތްކުރުމަށްޓަކައި އަނެއް ދިވެހިރާއްޖެ ކެމްޕޭން އަރުމާޒެއް އެއަތޮޅު އުކުޅަހުން ފަށައިފިއެވެ.

އަރިއަތޮޅުގައި އަނެއް ދިވެހިރާއްޖެ ކެމްޕޭންގެ ކަންތައް ހިންގުމުގައި އިސްކޮށް އުޅުއްވާ މޫސާ ނައީމް މިއަދު މައުލޫމާތު ދެއްވި ގޮތުގައި އުކުޅަހު ޒުވާނުން އިންތިޒާމުކުރި އަރުމާޒުގައި ޒިޔާރަތްކުރުމަށް ހަމަޖެހިފައިވަނީ އެއަތޮޅު މަތިވަރި، ބޮޑުފޮޅުދޫ، ހިމަންދޫ އަދި ފެރިދޫއަށެވެ.

“ޒުވާނުން މިއަރުމާޒުގައި ރަށްރަށަށް ގޮސް އެރަށްރަށުގެ ޒުވާނުންނާއި ރަށްރަށުގެ އިސްވެރިންނާއި ބައްދަލުކުރައްވާނެ” މޫސާ ނައީމް ވިދާޅުވިއެވެ. މިހާރުގެ ވެރިކަން ބަދަލުކުރުމަށް އަރިއަތޮޅުގެ ޒުވާނުން އެދޭ މިންވަރު ރަމްޒުކޮށްދޭ މިއަރުމާޒަށް ޒިޔާރަތްކުރާ ހުރިހާ ރަށަކުންވެސް ވަރަށް ބޮޑު ތަރުހީބެއް ލިބެމުންދާކަމަށް މޫސާ ނައީމް ވިދާޅުވިއެވެ.

މިދަތުރުގައި ކުރާނެ ކަންތައްތަކަކީ ރަށްރަށުގެ ޒުވާނުންނާއި ބައްދަލުކޮށް އަނެއް ދިވެހިރާއްޖެ ކެމްޕޭންގެ މެސެޖް ޒުވާނުންނަށް ފޯރުކޮށްދިނުމާއި އެރަށްރަށުގެ ޒުވާނުން އެދޭ ގޮތްތައް ސާފުކޮށް އެރަށްރަށުގައި އަނެއް ދިވެހިރާއްޖެ ކެމްޕޭން ހިންގާނެގޮތް ކިޔައިދީ ވޯޓުލާދުވަހު ކަންތައްކުރާންޖެހޭ ގޮތްތައް ކިޔައިދިނުން ކަމުގައި މޫސާ ނައީމް ވިދާޅުވިއެވެ
މީގެ އިތުރުން ބުދަ ދުވަހުގެ ރޭ އަނެއްދިވެހިރާއްޖެ ކެމްޕޭން ޖަގަހައެއް އުކުޅަހުގައި ހުޅުވާފައިވާކަމަށްވެސް މޫސާ ނައީމް މައުލޫމާތު ދެއްވައެވެ.