އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދު (އަންނި) މެދުރާއްޖެތެރޭގެ ހަތަރު އަތޮޅަކަށް މިހަފްތާ ބަންދުގައި ޒިޔާރަތްކުރައްވާނެއެވެ.
އެމްޑީޕީގެ ކެމްޕޭން އޮފީހުން މައުލޫމާތު ދޭގޮތުގައި މިދަތުރުފުޅުގައި ކެންޑިޑޭޓް ޒިޔާރަތް ކުރައްވާނެ އަތޮޅުތަކަކީ ފ، މ، ތ، ދ އަށެވެ. ހުކުރު ދުވަހު ފައްޓަވާ ނިންމަވާލެއްވުމަށްފަހު ކެންޑިޑޭޓް މާލެއައުމަށް ހަމަޖެހިފައިވަނީ ހޯމަދުވަހުގެ ރެއެވެ.
މިދަތުރުފުޅުގައި އެންމެ ފުރަތަމަ ކެންޑިޑޭޓް ވަޑައިގަންނަވާނީ ފ އަތޮޅުގެ ރަށްތަކަށެވެ. މިގޮތުން ހުކުރު ދުވަހު އެއަތޮޅުގެ ފަސް ރަށަށް ޒިޔާރަތްކުރައްވާނެއެވެ.

ހޮނިހިރު ދުވަހާއި އާދީއްތަ ދުވަހު ތ އަތޮޅުގެ ނުވަ ރަށަކަށް ކެންޑިޑޭޓް ޒިޔާރަތްކުރައްވާނެއެވެ. އާދީއްތަ ދުވަހު ހަވީރު ކެންޑިޑޭޓް ދ އަތޮޅުގެ ވާނީ އަށް ޒިޔާރަތްކުރައްވާނެއެވެ. ދ އަތޮޅުގެވެސް ތިން ރަށަކަށް ކެންޑިޑޭޓް ޒިޔާރަތްކުރައްވާނެއެވެ.
ހޯމަ ދުވަހު ކެންޑިޑޭޓް ޒިޔާރަތްކުރައްވާނީ މ އަތޮޅުގެ ރަށްތަކަށެވެ. މ އަތޮޅު ހަތަރު ރަށަށް ޒިޔާރަތްކުރެއްވުމަށްފަހު ކެންޑިޑޭޓް ވަޑައިގަންނަވާނީ މާލެއެވެ.

މިދަތުރުފުޅުގައި ނަޝީދ ޒިޔާރަތްކުރައްވާ ރަށްތަކުގެ ގެތަކަށް ޒިޔާރަތްކޮށް ރައްޔިތުންގެ ހާލު ބައްލަވާނެއެވެ. އަދި އެބޭފުޅާގެ ރިޔާސީ ފަސް ވަޢުދުގެ ތެރެއިން “މަސްތުވާތަކެއްޗަށް ހުޅުވި ދޮރުތައް ބަންދުކުރާނެ”ކަމަށްވާ ވައުދުވުން މިހަފްތާގެ އާދީއްތަ ދުވަހު ތ އަތޮޅުގައި އާއްމު ކުރައްވާނެއެވެ.