ހދ. ހަނިމާދޫ، ރޭގަނޑު 11:30 – ކުރިމަތިވަމުން އަންނަ އެމްޑީޕީގެ ރިޔާސީޕްރައިމަރީ އަށް ވާދަކުރެއްވުމުގެ ކެމްޕޭންގައި ތިލަދުންމައްޗަށް ވަޑައިގެން އުޅުއްވާ އެޕާޓީގެ އެއްކޮއްލި ގޮފީގެ މެމްބަރ ގ. ކެނެރީގެ މުހަންމަދު ނަޝީދު،އަންނި ގެ މިދަތުރުގެ ފަހު ޖަލްސާ ހުކުރު ވިލޭރޭ ހަނިމާދޫގައި ބޭއްވުމަށް ފަހު ހަމަ އެރޭގެ ދަންވަރު ފްލައިޓުން މާލެ ވަޑައިގަންނަވާ ގޮތައް ހަމަ ޖެހިފައިވާ ކަމަށް މިކެމްޕޭން ގެ މީޑިއާ އެންޑް ޕަބްލިކް ރިލޭޝަންސް މެނޭޖަރ މުޙަންމަދު ޒުހޭރު މަޢުލޫމާތު ދެއްވައެވެ. ހއ. ދިއްދޫ ގެ ޒިޔާރަތަށް ފަހު ބުރާސްފަތި ދުވަހުގެ ހެނދުނު އަންނިގެ ވަފްދު ކެލާ އަށް ލެފިއިރު އެހެންވެސް ރަށްތައް ފަދައިން ޤައުމީ ދިދަ އާއި އެމްޑީޕީ ދިދަތަކާ އެކު ކެލާގައި ތިއްބެވި ގިނަ ޢަދަދެއްގެ އެމްޑީޕީ މެމްބަރުން ވަފުދަށް އިސްތިގުބާލު ކޮއް މަރުހަބާ ކިޔާފައި ވެއެވެ. ޕާޓީގެ މެމްބަރުންނާ އެކު ވަކިވި ބައްދަލު ވުން ތަކާ އަދި ހއ. ކެލާ ކާނިހިޔާ ރެސްޓޯރަންޓްގެ އޯޕަން އެއަރ ގައި މެންދުރު ބޭައްވި އެކުވި ބައްދަލު ވުމުގައި މުހަންމަދު ނަޝީދު ދެއްކެވި ވާހަކަ ފުޅުގައި ޒަމާން ތަކަށް އެކަހެރި ކޮއްގެން ބައެއް ރަށްރަށް އުވާލުމަށް ގެންގުޅޭ ސަރުކާރުގެ ފޮރުވިފައިވާ ސިޔާސަތުގެ ދަށުން ކެލައަށް ދިމާވެފައިވާ މައްސަލަ ތަކަށް އިއްތިހާދުގެ ވެރިކަމެއްގައި ކޮންމެހެން ހައްލު ހޯދައިދޭން ޖެހިފައިވާ ކަމަށް ވިދާޅުވިއެވެ. މިސަރުކާރުން އުފެއްދި މަސްތުވާ ތަކެތީގެ ވަބާ ގައި ޖެހިފައިވާ ޒުވާނުން އަނބުރާ މުޖުތަމައަށް ގެންނަ ވާހަކަ ދައްކަން މިސަރުކާރު ލަދުވެތި ނުވާ އިރު، މިސަރުކާރުން އެކަހެރި ކޮއްފައިވާ ހއ. ކެލާފަދަ މުހިންމު އެތައް ރަށެއް ރާއްޖޭގައި މިހާރު އެބައޮތް ކަން މެމްބަރުންނާ ދެއްކެވި ވާހަކަ ފުޅުތަކުގައި އަންނި ފާހަގަ ކުރެއްވިއެވެ. އަދި ރަށްރަށުގައި އުފައްދާ ތަކެއްޗަށް ލިބޭ އެންމެ ބޮޑުފައިދާ މިހާރު ލިބެނީ މާދުރުގައި ތިބޭ ބަޔަކަށް ވާތީ، އެކަން ބަދަލުކޮއް ތަކެތީގެ ރަނގަޅު ނަފާ ތަކެތި އުފައްދާ މީހުންނަށް ލިބެންޖެހޭނެތީ އިއްތިހާދުގެ ވެރިކަމެއްގައި މީން އެއްވެސް ކަމެއް ހަނދާން ނައްތާލައިގެން ނުތިބެވޭނެ ކަން ފާހަގަ ކުރެއްވި އެވެ. އަދި އެއްރަށް އަނެއް ރަށާ ގުޅިލާމެހުމަށް ވަގުތުން ވަގުތައް ބޭނުންވެފައިވާ ޒަމާނީ ފެރީގެ ނިޒާމު ވާން ޖެހޭނީ ސްކޫލަށް ނުވަތަ ބައިސްކޯފަށް ގޮސްލާފަ އެނބުރި ރަށަށް އާދެވޭ ފަދަ ނިޒާމެއް ކަމަށް ވިދާޅުވިއެވެ. ސަރުކާރުން ގަސްތުގައި ނުކޮއްދީ އޮތުމުން ނުވެ އޮތްކަމުގައި ވިޔަސް ސާފުބޯފެނާ ނަރުދަމާ އާއި ދަތުރުފަތުރުގެ ވަސީލަތް ތަކާ އެފަދަ އަސާސީ ޚިދުމަތް ތަކަކީ މީގެ އެތައް އަހަރެއް ކުރިން ނިމިފައި ހުންނަން ޖެހޭނެ ކަންކަން ކަމުގައި އިއްތިހާދުގެ ވެރިކަމުން ގަބޫލު ކުރާނެ ކަން ފާހަގަ ކުރައްވާ މިކަންކަމަކީ ތާހިރު ދިރިއުޅުމެއްގެ އަސާސްގައި ހިމެނޭ ކަން ކަން ކަމުގައި ފާހަގަ ކުރެއްވިއެވެ.
ހަނިމާދޫ ގައި ވާހަކަ ދައްކަވަމުން އަންނި ފާހަގަ ކުރެއްވި ގޮތުގައި މިހާތަނަށް ކުރެވިފައިމިވަނީވެސް މީގެ ކުރިން ކުރެވޭނެ ކަމަށް ބަޔަކު ގަަބޫލު ކުރި ކަންކަމެއް ނޫނެވެ. އެއްވެ އުޅުމާ ޚިޔާލާ ޝުޢޫރު ފާޅު ކުރުމުގެ މިނިވަން ކަމާ އަދިވަކިން ވެރިމީހާ އަށް ފާޑު ކިއުމަކީ ވާނެ ކަމެއް ކަމަށް ގަބޫލެއް ނުކުރެވެއެވެ. އަމުދުން ސިޔާސީ ޕާޓީ ހެދުމަކީ އެ ކުރެވޭނެ ކަމެއް ކަމަކަށް ވިދާޅުވެލައްވަން ކެރިވަޑައިގަތް ބޭފުޅަކު ވެސް ކުރިން ނެތް ކަމަށެވެ. އެހެން ނަމަވެސް މިހާރު މިތިބީ އެހުރިހާ ކަމެއް ހާސިލު ކޮއްފައި ކަން ފާހަގަ ކުރެއްވިއެވެ. ހަމަ އެގޮތައް އިއްތިހާދުން ކުރާނެ އެންމެ މުހިންމު އެއްކަމަކީ ތިލަދުންމައްޗާ އުތުރު މުޅި ދުނިޔެއަށް ހުޅުވާލުން ކަމަށާ، އިރާދަ ކުރެއްވިއްޔާ ހަނިމާދޫ އެއަރޕޯރޓް މާނަވީ ގޮތުގައި ބައިނަލް އަގުވާމީ ފްލައިޓް ތަކަށް ހުޅުވާލާނީ އިއްތިހާދުގެ ވެރިކަމުގައި ކަން ފާހަގަ ކުރެއްވިއެވެ. އަދި މިސަރުކާރުން އިހަށް ދުވަހު ގަން ބައިނަލް އަގުވާމީ ކުރުމުން އެކަން ވެފައިއެވަނީ ގަމުގެ އެއަރޕޯރޓްގެ ތާރީޚީ ރީތި މާޒީ އަށް މިސަރުކާރުން ކުރި ބޮޑު މަލާމާތެއްގެ ގޮތުގައި ކަމަށާ މިކަން ކަން ބަދަލު ކުރުމުގެ ކުޅަދާނަ ކަމާ ގާބިލިއްޔަތު ދިވެހިރައްޔިތުންނާ އެރައްޔިތުންގެ އިއްތިހާދުގެ ކިބައިގާ ހުރިކަން ފިސާރި ބޮޑަށް މިފަހަރު ހާމަވާނެ ކަމަށް އަންނި ވިދާޅުވިއެވެ.

ތިލަދުންމައްޗަކީ އަތޮޅު ތަކުގެ އާބާދީގެ ދެވަނަ އާއި ތިންވަނައަށް އެންމެ މީހުން ގިނަ އާބާދީ ނިސްބަތްވާ އަތޮޅުތައް ކަމަށް ވާތީ އަންނިގެ ކެމްޕޭން އަށްވުރެ ބޮޑުއިސްކަމެއް މިދަތުރުގައި ދެވެނީ އެމްޑީޕީ މިސަރަހައްދުގައި ވަރުގަދަ ކުރުން ކަމަށާ، ވަފުދުގެ މެމްބަރުންނާ ޕާޓީ މެމްބަރުން ގުޅިގެން ކުރިއަށް ގެންދިޔަ މިމަސައްކަތް ވަރަށް ކާމިޔާބު ކަން ޒުހޭރު ފާހަގަ ކުރެއްވި އެވެ. މިއިންތިޚާބަށް ވާދަކުރެއްވުމަށް ޓަކާ މުހަންމަދު ނަޝީދު ވަނީ އޭނާ ފުރުއްވަމުން ގެންދެވި އެމްޑީޕީގެ ޗެއަރޕާސަންގެ މަގާމުން އިސްތިއުފާ ދެއްވާ ، ޑިމޮކްރެޓޮކް އުސޫލުން ކަން ކުރެއްވުމަށްޓަކާ، ޕާޓީގެ ޒަޢީމުކަމުން އިސްތިއުފާ ދެއްވުމަށް ޑީއާރުޕީގެ ޒަޢީމަށް ގޮވާލައްވާފައެވެ.