އަހުމަދު އަލީ ނަސީރު

އަޅުގަނޑުމެން ގެ ތެރެއިން ބަޔަކު މިތިބީ އެންމެ ފަހުގެ ޑިޒައިނަރ ހެދުން ލައިގެން އެންމެ ޒަމާނީ ވަސް ދުއްވައިގެންނެވެ. އަޅުގަނޑުމެންގެ ވަށައިގެން އުސް އިމާރާތްތަކާއި އޮފްއަރާ ކާރުތައް މިވަނީ ތޮއްޖެހިފައެވެ. އެންމެ މިޒަމާނުގެ ޓެކްނޮލޮޖީ އާއި އެންމެ މިހާރުގެ ސާމާނުތަކުން ގުދަންތަކާއި ސިޓިންގްރޫމްތައް އެވަނީ ބަންޑުންލާފައެވެ. އެފްއެމް ތަކުގެ ތުއި އަޑުތަކުން ތެމިފޯވެ، އެނބުރޭ މާބުރުތަކެއްގެ ސިފަޖެހި، މިތިބީ ތަރައްގީވެފައި ދޮގެއްތޯއެވެ؟ އަޅުގަނޑުމެން ސެލްފޯނާއި ބާރަށް ދުއްވާ ރޭސް ކާރުތަކުގެ ތިޔާގިކަމަށް ގެނބި ތިބޭއިރު، ތިޔަ ވިދާޅުވާ ތަރައްގީ އަޅުގަނޑުމެން ގެންދިޔައީ ކޮންތާކަށްތޯއެވެ؟ ފެޝަނާއި ފަންނާނުންގެ އުފާތަކުން ދިވެހިންނަށް މިލިބުނީ އެކާވީސްވަނަ ގަރުނުގެ ތަހްޒީބު ތޯއެވެ؟ ތަރައްގީއަކީ ފަހެ ކޮބައިތޯއެވެ؟ ބޮޑެތި އިމާރާތްތަކާ ޒަމާނީ އަޅާނުލުން ތޯއެވެ؟ ނުވަތަ ތަރައްގީއަކީ ރޫހާނީ ގޮތުންނާއި މާއްދީ ގޮތުން ފުދިފައި ތިބުންތޯއެވެ؟

އަޅުގަނޑުމެން 28 އޮކްޓޯބަރ 2008 ވާ އަންގާރަދުވަހާ ކުރިމަތިލާއިރު ވިސްނަވާލައްވާށެވެ. މިތިބީ ކިހާ ހިސާބެއްގައިތޯއެވެ؟
އދ. މަޖިލީހުގެ ބެލުންތަކުގެ ފުރަގަހުގައި އޮތީ ކޮން މަންޒަރުތަކެއްތޯއެވެ؟ ހިއުމަން ޑެވަލަޕްމަންޓް އިންޑެކްސް ގެ ބިތްދޮށުގައި މިތިބީ އަޅުގަނޑުމެންގެ ކޮޓަރި އާއިލާތަކެވެ. ގަނަތެޅޭ ނިކަމެތި ދިވެހި ރައްޔިތުންނެވެ.

ގިނަ އަދަދެއްގެ ކުދިން ޖީސީއީ އޯލެވެލްގައި ފާހެއް ނުވެއެވެ. ބާރުގަދަ ޑްރަގް އެތެރެވާ ދޮރޯށިތައް ބަންދެއްނުވެއެވެ. ދިރިއުޅެން މިޖެހެނީ ކުދިކުދި އަލިފާންފޮށިތަކުގެ ތެރޭގައި، އިންސާނީ އިއްޒަތް ކެނޑި ނިކަމެތިވެގެންނެވެ. އަޅުގަނޑުމެންގެ ގިނަ ބަޔަކު އަދިވެސް މިތިބީ އިންސާނީ ހައްގު އެއީ ކޮންބާވަތެއްގެ އެއްޗެންކަންވެސް ނޭގި ގެއްލިފައެވެ. އާއިލާގެ މީހަކު ނުވަތަ ތިމާމީހާ ބަލިހާލުގައި ޖެހޭ ދުވަހު، ތިމާ ހުންނަނީ ދަރާ ވިކިފައެވެ. އިތުބާރު ހިފޭ މައުލޫމާތުން އެކަހެރިވެ އަނިޔާވެރިންގެ އަޅުންނަށްވެ، ގޮތް ހުސްވެފައެވެ. މިކަމާ ވިސްނަނީވެސް ވަރަށް މަދު ބައެކެވެ.
އަޅުގަނޑުމެން މިއަދު މިތިބީ ކޮން ހާލެއްގައިތޯއެވެ؟ ވޯޓު ދިނުމުގެ ކުރިން ވިސްނަވާލައްވާށެވެ.

ދިވެހިން މިތިބީ، ދީނީ އަޚުލާގުގެ މިންގަނޑުތައް ފައްތާނެ ގޮތެއް ނޭނގި އިއުތިގާދު ބަނގުރޫޓު ވެފައެވެ. އަމިއްލަ ސިކުނޑިން ވިސްނުމުގެ ޖާގަ ނެތިފައެވެ. ޚިޔާލު ފާޅުކުރުމަކީ އިންސާނީ ހައްގެއްކަން މި އެނގެނީ ވަރަށްމަދު ބަޔަކަށެވެ. އަނެއްކޮޅުން މައުލޫމާތަކީ ސަރުކާރުގެ މިލްކެކެވެ. ސިއްހީ މިންގަނޑުތައް ހުރިގޮތް އެނގިވަޑައި ގަންނަވާނެއެވެ.

ކުރުގޮތަކަށް ދަންނަވާލަންތޯއެވެ؟ ބޮޑެތި އެންމެ މިޒަމާނުގެ އިމާރާތްތައް ވަށައިގެން އުފެދިފައި މިއޮތީ ދިވެހިންގެ ‘ގެޓޯ’ އެވެ. 30 އަހަރުގެ އަޅާނުލުމުގެ ސިޔާސަތު މިއޮތީ ފެންނާށެވެ. ކުދިކުދި ޓިނު ގޮޅި ހަދައިގެން ވަދެ ނޭވާ ތާށިވެ އޮކްސިޖަނަށް ބޭނުންވެ އެތިބީ، މާލެފަދަ ބައިބޯ ރަށްރަށުގައި ކޮޓަރި އާއިލާތަކެވެ. މީ ތަރައްގީތޯއެވެ؟ ނުވަތަ ރައީސް މައުމޫނުގެ ލެގެސީތޯއެވެ؟
ތަރައްގީއަކީ ތިމާމީހާ ފުދުންތެރި ހަމަޖެހޭ އަދި އުފެއްދުންތެރި މީހަކަށްވުމެވެ. އަމިއްލަ ފަރުދަކީ ހައްގުތަކަކާއި ގުދްރަތީ ބާރުތަކެއް ލިބިފައިވާ އިންސާނެކެވެ. އެހެންކަމުން އަމިއްލަ ފަރުދުން ތަރައްގީވުމުން އެ ޖަމާއަތެއް ނޫނީ ކޮމިއުނިޓީއެއް ތަރައްގީވާނެ ނޫންތޯއެވެ؟

އަޅުގަނޑު ދެކޭ ގޮތުގައި، ޑިމޮކްރަސީއެއް ބިނާކުރުމުގެ ނިޔަތެއް އޮތް އެއްވެސް މީހަކު، އަމިއްލަ ފަރުދުންގެ ވިސްނުމާއި ޚިޔާލުފާޅުކުރުން ވަކިގޮތަކަށް ހަނިކޮށް ހިފަހައްޓާކަށް މަސައްކަތެއް ނުކުރާނެއެވެ. ތާއަބަދު ވެރިކަން ކުރާކަށް ނުރާވާނެއެވެ. ރައްޔިތުންގެ އިއްޒަތުއްނަފްސު ލޫޓުވާލާކަށް މަސައްކަތެއް ނުކުރާނެއެވެ.
ވިސްނަވާށެވެ. ރައްޔިތުން އަމިއްލަ ހިއްސުތަކުގެ ބޭނުން ބިރެއްނެތި ހިފަން ފެށީމާ، ޑިކްޓޭޓަރުން ވަރަށް ބިރުގަންނާނެއެވެ. މީހުން އެކުވެ ޚިޔާލުތައް ބަދަލުކޮށް ބަހުސްކޮށް އުޅޭ ރައްޔިތަކު ދެކެން ބޭނުންނުވާ މީހާ އުޅޭނީ، ފުޓްބޯޅަޔާ ބަނޑިޔާ ކުދިން ނެރެގެން، ރަށުތެރޭގައި ބޮޑެތި ނާމާން ފޮޓޯ ތަތްކޮށްގެން، ބިރުދައްކައިގެން ރިޝްވަތު ބަހައިގެން ވޯޓުފޮށިން ވައްކަން ކުރާށެވެ. އާއިލީ ވެރިކަމެއް ދިގުދަންމާށެވެ.
މީގެ ބިތްދޮށުގައި އޮތް ހަގީގަތަކީ، 30 އަހަރު ތަރައްގީވި މިންވަރު ބޮޑުކަމުން، ރިޔާސީ އިންތިޚާބުގެ ފުރަތަމަ ބުރުގައި 8 އޮކްޓޯބަރ 2008 ގައި، 40 އިންސައްތަ މީހުންނަށް މައުމޫނަކީ އަނިޔާވެރި ޑިކްޓޭޓަރެއްކަން ނޭނގުމެވެ. މިދިޔަ ދިގު ތާރީޚުގައި، ހަގީގީ ތަރައްގީ ރާއްޖެއަށް އަހުލުވެރިވެފައި އޮތް ނަމަ، ޑިމޮކްރަސީއާއި ތަރައްގީ ރާއްޖޭގައި ދިރިއޮތްނަމަ، އެންމެ ދިވެއްސެއްވެސް މައުމޫނަކަށް ވޯޓެއް ނުލާނެއެވެ. މިއިން ދޭހަވަނީ ވޯޓުލީ މީހުންނަށް ފުރިހަމަ މައުލޫމާތު ލިބިފައި ނެތްކަމެވެ. އެމީހުންގެ ސިކުނޑި ތަޅުލާފައިވާކަމެވެ. ކެންޑިޑޭޓް މައުމޫން ވަކި ސިފައެއް ޖެހިގެން، ހުދު އަތްތިލައެއް ދައްކައިގެން ރައްޔިތުންގެ ބޮޑު ބަޔަކަށް އޮޅުވާލައިގެން އުޅޭކަމެވެ.

އިންސާނީ ތަރައްގީގެ މިންގަނޑުން ބަލާއިރު ދިވެހިން މިތިބީ ވަރަށް ފަހަތުގައިކަން، މި ރިޔާސީ އިންތިޚާބުގެ ފުރަތަމަ ބުރުގައި ފެނުނު ހިސާބު ތަކުން އެނގެއެވެ. އަޅުގަނޑު ހިތަށް އަރަނީ (އަލްޖަޒީރާ ގެ އިންޓަރވިޔުއަށްފަހު) ދުންޔާ މައުމޫން އޭނާގެ ބައްޕާފުޅު ރައީސް މައުމޫނު ދިފާއު ކުރައްވަން ވެގެން، ދޮގު މައުލޫމާތު ފަތުރައްވަމުން ގެންދަވާނެ އެވެ. ވެރިކަމުގައި އެކަމަނާގެ ބައްޕާފުޅު ދެމި އިންނެވުމަށް ކިތަންމެ އުއްމީދެއް ކުރެއްވި ނަމަވެސް، ބައިނަލް އަގްވާމީ އަދި އިންސާނީ ހަމަތަކުން ބަލާއިރު، ބައްޕާފުޅަކީ ޑިމޮކްރަސީ ގެ އެއްވެސް ވިސްނުންފުޅެއް ސިކުނޑީގައި އެއްވެސް އިރަކު ގެންގުޅުއްވި ވެރިއެއްނޫނެވެ. ބޮޑު ދޮގުވެރިއެކެވެ. މިކަން ތަފާސް ހިސާބުތަކުންނާއި ހަމަލޮލަށް ފެންނަ ފެނުމުން ޔަގީން ވެއްޖެއެވެ. ނަމަވެސް މެލޭޝިޔާގެ ކުރީގެ ބޮޑު ވަޒީރު މަހާތިރު މުހައްމަދު ގެ މިންގަނޑުން ރައްޔިތުން މިނެކިރާއިރު، ނޫނީ މިކިޔާ ‘އޭޝިޔަން ވެލިއުސް’ އަށް ދިވެހިން ފައްތާއިރު، ޑިމޮކްރަސީ އެއް ދުވަހަކުވެސް ދިވެހިންނަކަށް ހައްގެއް ނުވާނެއެވެ. ރައީސް މައުމޫނު ހިތްޕުޅަށް އަރައިވަޑައި ގަންނަވަނީ، ދިވެހިންގެ ޒަމާނީ ތަރައްގީ ނުވަތަ އެބައިމީހުންގެ މުޅި ދިރިއުޅުން ފެށުނީ 1978 ގައި ކަމަށް ބާވައެވެ؟ އޭގެ ކުރީގެ އެއްވެސް ތާރީޚެއް ނެތީތޯއެވެ؟

އަޅުގަނޑުމެން މިކަންކަމާމެދު ފުންކޮށް ވިސްނާލުމުން، އަޅުގަނޑުމެންނަށް އެނގޭނެއެވެ. ތަރައްގީވެ އުފަލުގައި ހަމަޖެހިގެން އުޅެވޭނީ ކިހިނެތް ހަދައިގެންކަން މިހިސާބުން މިހާރު އެނގޭނެއެވެ. ހިނގަންވީ މަގު ފެންނާނެއެވެ. އަނެއް ދިވެހިރާއްޖެ އަށް ފުރަން ދަތުރަށް އަރާގަޑި ޖެހުނީނޫންތޯއެވެ؟ މިހާރު ދެން، އަލިވިލެންސް ކައިރިވެއްޖެއެވެ.

ހިތުގައި ވާހާ ގޮތްހޯދަން، ހިތުގައި ވާހާ ފަލިޖަހަން ބޭނުންފުޅުނަމަ، 28 އޮކްޓޯބަރ 2008 ވާ އަންގާރަ ދުވަހު ވޯޓު ދެއްވާށެވެ. ގޮތް ނިންމަވާށެވެ. އެދުވަހަކީ، ދިވެހިންގެ ހަގީގީ ތަރައްގީއަށް އަލިވިލޭ ދުވަސް ކަމުގައި ހައްދަވާށެވެ. (ނިމުނީ)