ވަތަން އެދޭގޮތަށް ގުޅިފައިވާ އިއްތިހާދުގެ ސަރުކާރަކުން ގެންގުޅުއްވާނެ ސިއްހީ ސިޔާސަތު ނަރުހުންނަށް ހާމަކޮށްދެއްވުމަށް ބައްދަލުވުމަށް ބާއްވައިފިއެވެ.

ހުކުރު ދުވަހުގެރޭ ނަލަހިޔާ ހޮޓެލްގައި ބޭއްވި މިބައްދަލުވުމުގައި އިއްތިހާދުގެ ސަރުކާރަކުން ގެންގުޅުއްވާނެ ސިޔާސަތު ހާމަކުރުމުގެ އިތުރުން މިހާރު ސިއްހީ ދާއިރާގައި ހިތްހަމަނުޖެހޭ ގޮތަށް ހުރި މައްސަލަތައް ނަރުހުންގެ ކިބައިން ސާފުކުރެއްވިއެވެ. މިބައްދަލުވުމުގައި އިއްތިހާދުގެ ފަރާތުން މައުލޫމާތު ދެއްވީ އެމްޑީޕީގެ ހިޔަނި ވަޒީރު ޑރ އައިމިނަތު ޖަމީލެވެ.

ނަރުހުންގެ މިބައްދަލުވުމަށް ވަރަށް ގިނަ ނަރުހުން ހާޒިރުވިއެވެ. އަދި ނަރުސްކަމުގެ ތައުލީމު ހޯއްދަވައިގެން އެންމެ ފުރަތަމަ މިހިދުމަތް ރާއްޖޭގައި ދެއްވާން ފެއްޓެވި ދެބޭކަބަލުން ކަމުގައިވާ އަލްފާޟިލާ ނަސީމާ މުހައްމަދު ކަލޭފާނާއި އައިޝަތު އިބްރާހިމްދީދީ މިބައްދަލުވުމަށް ވަޑައިގަތް ކަން މިކެމްޕޭންގެ ފަރާތުން ފާހަގަކުރަމެވެ.

މިބައްދަލުވުމުގައި ނަރުހުންގެ ކިބައިން ލިބުނު މައުލޫމާތުތަކުން ނަރުހުންނަށް މިއަދު ދިމާވެފައިވާ މައްސަލަތަކާއި މިހާރުގެ ސިއްހީ ނިޒާމާއި މެދު އާއްމުންގެ އިތުބާރު ގެއްލިފައިވާ ސަބަބުތަކާއި ނަރުހުންނަށް ވަޒީފާގެ ކުރިއެރުމާއި ތައުލީމީ ރޮނގުން ލިބެންވާ ހައްގުތައް އެކަށީގެންވާ ގޮތެއްގައި ނުލިބޭކަން އެނގިގެން ދިޔައެވެ. މީގެ އިތުރުން ނަރުހުންގެ މަސައްކަތުގެ އަގުވަޒަން ނުކުރެވުމުގެ ޝަކުވާއާއި ނަރުހުންނަކީ މިއަދުގެ މުޖްތަމައުގައި ދަށް ބައެއްގެ ގޮތުގައި ބެލެވޭކަމުގައިވެސް އެބޭފުޅުންގެ ވާހަކަތަކުން ދޭހަވިއެވެ.