އައްޑޫގައި ތިބި އިނގިރޭސީން އައްޑޫ ދޫކޮށްލިއިރު އަނެއް ދިވެހިރާއްޖޭގައި ދިވެހިން އެދޭ ހުރިހާކަމެއް އައްޑޫގައި ފުރިހަމަވެފައި ހުރިކަމުގައި އެމްޑީޕީގެ ރިޔާސީ ކެންޑިޑޭޓް ވިދާޅުވެއްޖެއެވެ.

ރިޔާސީ ކެންޑިޑޭޓް މުހައްމަދު ނަޝީދު (އަންނި) މިހެން ވިދާޅުވީ އައްޑޫގެ ރައްޔިތުންނާއި ބައްދަލުކުރެއްވުމަށް ރޭ ހިތަދޫ މުހިއްބުއްދީން ސްކޫލުގައި ބޭއްވި ޖަލްސާގައެވެ. ނަޝީދު ވިދާޅުވި ގޮތުގައި އިނގިރޭސީން އައްޑޫ ދޫކޮށްލި އިރު އައްޑޫއަކީ އެއްބިލިއަން ޑޮލަރުގެ އަގު ހުރިތަނެއް ކަމުގައެވެ. ނަމަވެސް އޭގެ 38 އަހަރުފަހުން ބަލާއިރު ރާއްޖެ މިވަނީ އެއްބިލިއަން ޑޮލަރަށްވުރެ ބޮޑަށް ދަރަނިވެރިވެފައިކަމުގައި ނަޝީދު ފާހަގަކުރެއްވިއެވެ.

އަނެއް ދިވެހި ރާއްޖޭގައި ދިވެހިން ބޭނުންވާ ކަންތައް އައްޑޫގައި މީގެ 38 އަހަރުކުރިން ހުރިކަމުގެ ހެކި ދައްކަވަމުން ނަޝީދު ވިދާޅުވީ އޭރު އައްޑޫގައި ސަލާން ނުޖަހާ ބޭސްފަރުވާ ކުރެވޭނެ ހޮސްޕިޓަލެއް ހުރިކަމުގައެވެ. އަދި އޭރު އައްޑޫގެ ރަށްތައް ދަތުރުފަތުރުގެ ނިޒާމުން ގުޅިފައިވުމާއި ރައްޔިތުންގެ ފުދިގެން ކުޑަ ޚަރަދަކުން ދިރިއުޅުމުގެ ކަންތައް ފުއްދަމުންދިޔަކަމުގައި ނަޝީދު ވިދާޅުވިއެވެ. އައްޑޫގައި އިނގިރޭސީން ހަދައިދިން އެއާޕޯޓާއި އެހެނިހެން ތަންތަނުގެ އެދެވޭ ފައިދާ އައްޑޫ ރައްޔިތުންނަށް ނުހިފިފައިވަނީ މި ސަރުކާރުގެ ސަބަބުންކަމުގައި ނަޝީދު ފާހަގަކުރައްވާފައިވެއެވެ.
މީގެ އިތުރަށް ނަޝީދު ދެއްކެވި ވާހަކަފުޅުގައި އައްޑު އަތޮޅުގެ ރައްޔިތުންނަކީ ވަރަށް ޚާއްސަ ބައެއްކަމުގައި ވިދާޅުވިއެވެ. އަދި ރާއްޖެ ބަދަލަކަށް ބޭނުންވެގެން އަންނަ ހިނދު އައްޑޫ ރައްޔިތުންނަކީ އެކަމުގައި ފާހަގަކުރެވޭ ދަރަޖައަކަށް ބައިވެރިވާބައެއްކަމުގައިވެސް ނަޝީދު ވިދާޅުވިއެވެ. މިގޮތުން އިބްރާހިމް ނާސިރުގެ ވެރިކަން ބަދަލުވެގެން ދިޔައިރުވެސް އައްޑޫ ރައްޔިތުން މުހިއްމު ދައުރެއް ކުޅުނުކަމުގައި ވިދާޅުވިއެވެ.

މިޖަލްސާގައި ނަޝީދުވަނީ އެބޭފުޅާގެ ރިޔާސީ ފަސް ވަޢުދު އައްޑޫގެ ރައްޔިތުންނަށް ތަފްސީލުކޮށް ކިޔައިދެއްވާފައެވެ.
ރޭގެ ޖަލްސާއަށް އައްޑޫ ރައްޔިތުންގެ ފަރާތުން ވަރަށް އެދެވޭ ތަރުޚީބެއް ލިބުނެވެ. މިގޮތުން މުހިއްބުއްދީން ސްކޫލުގެ ހޯލާއި ގޯތިތެރޭގައިވެސް ގިނަ އަދަދެއްގެ އާއްމުން ޖަލްސާގެ އަޑު އެހުމަށް އައިސް ތިއްބެވެ.