ދަތުރުފަތުރުކުރުމުގައި ދަތިތަކެއް ތަހައްމަލުކުރަން ޖެހިފައިވާ ރައްޔިތެއް ދިރިއުޅޭ
ފުވައްމުލަކުގައި ހެދޭ އެއާޕޯޓު ވާންޖެހޭނީ ރަގަޅަށް ދިރާސާ ކުރުމަށްފަހު ހެދޭތަނެއްކަމުގައި އެމްޑީޕީގެ ރިޔާސީ ކެންޑިޑޭޓް ވިދާޅުވެއްޖެއެވެ.

ރިޔާސީ ކެންޑިޑޭޓް މުހައްމަދު ނަޝީދު (އަންނި) މިހެން ވިދާޅުވީ ހޮނިހިރު ދުވަހުގެރޭ ފުވައްމުލަކުގެ ރައްޔިތުންނާއި ބައްދަލުކުރައްވަމުންނެވެ. ނަޝީދު ވިދާޅުވި ގޮތުގައި ފުވައްމުލަކުގައި ހެދޭ އެއާޕޯޓަށް ޖެއްސޭނީ ކޮންފެންވަރެއްގެ ބޯޓެއްކަން ނިންމޭނީ ކުރެވޭ ދިރާސާއަށްފަހުގައި ކަމުގައެވެ. ފުވައްމުލަކުގައި އެއާޕޯޓެއް ހެދުމަކީ އަނެއް ދިވެހިރާއްޖޭގައި ދިވެހިން އެދޭ ލާމެހިފައިވާ ދަތުރުފަތުރުގެ ނިޒާމަށް މުހިއްމު ބައެއްކަމުގައި ނަޝީދު ފާހަގަކުރެއްވިއެވެ. އަދި އެހެންކަންކަމުގައި އެބޭފުޅާއަކީ މާހިރެއް ނޫންނަމަވެސް ދަތުރުފަތުރުގެ ކަންތަކުގައި މާހިރެއްކަމުގައި ހާމަކުރެއްވިއެވެ.

ފުވައްމުލަކުގެ ރައްޔިތުންނާއި ބައްދަލުކުރެއްވުމަށްފަހު ނަޝީދު ވިދާޅުވީ އެރައްޔިތުންނަކީ އިލްމީ ބައެއް ކަމުގައެވެ. އަދި ދިވެހިން މިތިބީ ހަތަރު އަގޮޅިއެއްގައި ކަމަށާއި ޚަރާބުގެ މަގު ނުވަތަ ސަލާމަތުގެ މަގު ޚިޔާރުކުރުން އޮތީ ދިވެހިންގެ އަތްމަތީގައި ކަމަށެވެ. ފުވައްމުލަކުގެ ރައްޔިތުން ކަންކުރިމީހުންނަށް ހައްގު މަގާމު ދޭނެކަމަށް އުއްމީދު ކުރައްވާކަމުގައި ނަޝީދު ވިދާޅުވިއެވެ. އަދި ވިސްނާނުލާ އެޅޭ ފިޔަވަޅެއްގެ ސަބަބުން ދިވެހިން މިހާރު ހޯދާފައި މިވާ މިނިވަންކަމުގެ މަގާމު ގެއްލޭ ހިސާބަކަށްވެސް ދެވިދާނެކަމުގައި ނަޝީދު ވިދާޅުވިއެވެ.

މިހާރު ވެރިކަން ކުރަމުންދާ އުސޫލު ބަދަލުކުރުމަށްޓަކައި ވޯޓުލުމަށް ނަޝީދު ފުވައްމުލަކުގެ ރައްޔިތުންގެ ކިބައިން އެދިވަޑައިގަތެވެ. މިގޮތުން މާލޭގައި އެކަކު ހުރެގެން ހަމައެކަނި އޭނާގެ ވިސްނުމާއި އެއްގޮތަށް ހުރިހާ ކަމެއް ކުރުމުގެ ނިޒާމު ގަބޫލު ނުކުރެވޭކަމުގައިވެސް ނަޝީދު ވިދާޅުވިއެވެ. އަދި ރާއްޖޭގެ ރަށްތަކުގައި ތިބީ ވިސްނޭ ރައްޔިތުންކަމަށާއި އެބައިމީހުންގެ ރަށާއި އަތޮޅުގެ ކުރިއެރުމަށް މަސައްކަތްކުރުމަށް އެބައިމީހުންގެ ވިސްނުމާއި ހިޔާލުގެ ހިއްސާ މުހިއްމުކަމުގައި ނަޝީދު ފާހަގަކުރެއްވިއެވެ.

ނަޝީދު ވިދާޅުވިގޮތުގައި ފުވައްމުލަކުގެ ރައްޔިތުންނާއި އެބޭފުޅާއާއި އެންމެ ފުރަތަމަ ބައްދަލުވީ އިސްލާހަށް މަސައްކަތްކުރެއްވުމުގެ ސަބަބުން ދޫނިދޫގައި ބަންދުކޮށްފައި ހުންނެވި އިރެއްގައި ކަމުގައެވެ. އެއީ ފުވައްމުލަކުގައި ކަރަންޓުގެ އަގު ބޮޑުކުރުމުގެ މައްސަލައިގައި އިހްތިޖާޖުކުރި ޒުވާނުންތަކެއް ކަމުގައި ނަޝީދު ވިދާޅުވިއެވެ. ނަޝީދު ވިދާޅުވީ މިފަދަ ކަންތައްވަނީ ވެރިކަން ތަޣައްޔަރުވީމާ ކަމުގައެވެ. އަދި ވެރިކަމަކީ ރައްޔިތުން އޮބަހައްޓައިގެން ކުރާކަމެއް ނޫންކަމުގައިވެސް ނަޝީދު ހާމަކުރެއްވިއެވެ.
ހޮނިހިރު ދުވަހު ރޭގެ ޖަލްސާގައި ހިޔަނި މިނިސްޓަރ އައިމިނަތު ޖަމީލު ވާހަކަފުޅު ދެއްކެވިއެވެ. އެކަމަނާގެ ވާހަކަފުޅުގައި މަސްތުވާތަކެތީގެ ވަބާގައި ޖެހިފައިވާ ޒުވާނުންނަށް އަނެއް ދިވެހި ރާއްޖޭގައި އަޅާލާ އޯގާތެރިވެ މުޖުތަމަޢަށް އެނބުރިއައުމަށް އެހީވާނެކަމުގައި ވިދާޅުވިއެވެ. އަދި އަންހެން ބޭފުޅުންނަކީ ގަދަރުވެރި ވިސްނުންތެރިބައެއްކަމަށާއި އެބޭފުޅުންގެ ވޯޓު ވިއްކާނުލުމަށް ގޮވާލެއްވިއެވެ.