މިއަދު ރާއްޖޭގެ ރައްޔިތުންގެ އިއްޒަތުންނަފްސު ގެއްލިގެން ދާންޖެހޭ ސަބަބެއްކަމުގައި ހިމެނިފައިވާ ބޭސްފަރުވާއަށް ސަލާންޖަހަން އެމްޑީޕީގެ ސަރުކާރަކުންނައްތާލައްވާނެކަމަށް އެމްޑީޕީގެ ރިޔާސީ ކެންޑިޑޭޓް ވަޢުދުވެވަޑައިގެންފިއެވެ.
މުހައްމަދު ނަޝީދު (އަންނި)ގެ ރިޔާސީ ފަސްވަޢުދުގެ ތެރެއިން އެންމެ ފަހު ވަޢުދު މިއަދު ވެވަޑައިގަތީ އައްޑޫ އަތޮޅާއި ފުވައްމުލަކަށް ކުރެއްވި ދަތުރުފުޅުން އެނބުރިވަޑައިގަތްތާ މާގިނަ އިރުތަކެއް ނުވަނީހެވެ. ނަޝީދު މިވަޢުދު ވެވަޑައިގަތީ އެމްޑީޕީގެ ހަރުގޭގައި ނޫސްވެރިންނާއި ބައްދަލުކުރައްވަމުންނެވެ.

ބޭސްފަރުވާއަށް ސަލާންޖެހުން ނައްތާލައްވާނެކަމަށް ވަޢުދު ވެވަޑައިގަންނަވަމުން ނަޝީދު ވިދާޅުވީ އެމްޑީޕީން ވަމުންދާ ވަޢުދުތައް ﷲގެ އިރާދަފުޅާއި އެކު އެމްޑީޕީގެ ސަރުކާރަކުން ފުއްދައިދޭނެކަމުގައެވެ. މީގެ އިތުރަށް މިހާރު ރާއްޖޭގެ ރައްޔިތުންނަށް ސިއްހީ ގޮތުން އެންމެ ދަތިވެފައިވާ ދެތިންކަމެއް ނަޝީދު ފާހަގަކުރެއްވިއެވެ. މިގޮތުން ދަތުރުފަތުރުގެ ދަތިކަމުގެ ސަބަބުން އަތްފޯރާ އަގެއްގައި ސިއްހީ ހިދުމަތް ލިބުމަށް ދަތިވަމުން ދިޔުމާއި، ސިއްހީ ކުއްލި ހާލަތެއްގައިވެސް ވެލްފެއާ އަދި ތީމުގޭ ނުވަތަ ވިޔަފާރިވެރިއެއްގެ ގާތުގައި ސަލާންޖަހަން ޖެހުމާއި މަދިރީގެ ސަބަބުން ޖެހޭ ބަލިތައް ރާއްޖޭގެ ހުރިހާ ރަށެއްގައި އާއްމުވެފައިވުމާއި ނަރުދަމާގެ ސަބަބުން ފެންތަޣައްޔަރުވުމުގެ ސަބަބުން އުފެދޭ ސިއްހީ މައްސަލަތައް ފާހަގަކުރެއްވިއެވެ.

އެމްޑީޕީގެ ސަރުކާރެއްގެ ސިއްހީ ސިޔާސަތު ބިނާކުރާނެ މައިގަނޑުކަންތައްވެސް ނަޝީދު މިއަދު ހާމަކުރެއްވިއެވެ. މިގޮތުން ބައިނަލްއަގްވާމީ ފެންވަރުގެ ސިއްހީ ފަރުވާ ރާއްޖެއިން ފަސޭހައިން ލިބޭނެގޮތް ހެދުމާއި ކޮންމެ ރައްޔިތެއްގެ ހެލްތު އިންޝުއަރެންސް އޮތުމާއި ސިއްހީ ދާއިރާގެ މީހުންނަށް ހަގީގީ މާނައިގައި ތަމްރީންތައް ދިނުމާއި ފަރުވާކުޑަކަމުން ސިއްހީ ދާއިރާގެ މީހުންގެ ފަރާތުން ކުރިމަތިވާ މައްސަލަތައް ބެލޭނެ ނިޒާމެއް ކަނޑައެޅުމާއި ރަގަޅު ސިއްހީ ފަރުވާ ރައްޔިތުންނަށް ފޯރުކޮށްދިނުމަށްޓަކައި ބޭރުގެ ކުންފުނިތަކަށް ރާއްޖޭގައި ސިއްހީ ފަރުވާ ދެވޭނެ ގޮތަކަށް ހުޅުވާލައްވާނެކަމުގައި ވިދާޅުވިއެވެ.