މިދިޔަ ބުރާސްފަތި ދުވަހު ރައްޔިތުންގެ މަޖިލީހުން އެކުލަވާލެއްވި އިލެކްޝަންސް ކޮމިޝަނަކީ މިއަހަރު ބޭއްވޭ ރިޔާސީ އިންތިހާބު ހުޅުވާލެވިފައިވާ މިނިވަން އިންތިހާބަކަށް ހެދޭނެ ފެންވަރުގެ ގާބިލްކަން ހުރި ކޮމިޝަނެއްކަމުގައި އެމްޑީޕީގެ ޕާލިމަންޓްރީ ގްރޫޕުން ފާހަގަކުރައްވައިފިއެވެ.

މިއަދު އެމްޑީޕީގެ ހަރުގޭގައި ބޭއްވި ޕާލިމަންޓްރީ ގްރޫޕްގެ ނޫސްކޮންފަރެންސްގައި ވާހަކަ ދައްކަވަމުން ޕާލިމަންޓްރީގްރޫޕްގެ ވިޕް ޅ އަތޮޅުގެ މެމްބަރު އިބްރާހިމް މުހައްމަދު ސޯލިހު (އިބޫ) ވިދާޅުވީ އާ އިލެކްޝަންސް ކޮމިޝަނެއް ނުއުފެއްދުނު ނަމަ މިއަހަރުގެ ރިޔާސީ އިންތިހާބު ބާއްވަން ޖެހޭނީ ކދ އަހުމަދު މަނިކު އިލެކްޝަންސް ކޮމިޝަނަރުކަމުގައި ބަހައްޓައިގެންނެވެ. އަދި އެމްޑީޕީގެ ޗެއާޕާސަން މާރިޔާ ވިދާޅުވި ގޮތުގައި ކދގެ ކޮމިޝަނަރުކަން ނިންމުމަކީ ދިވެހި ރައްޔިތުންގެ މައްޗަށް އޮތް ވާޖިބެކެވެ.

ޕާލިމަންޓްރީ ގްރޫޕްގެ ރައީސް ހަސަން އަފީފް މިއަދު ހާމަކުރެއްވި ގޮތުގައި މިހާރު ހޮވިފައިވާ އިލެކްޝަންސް ކޮމިޝަނަރކަމަށް ހޮވިވޑައިގަތް ބޭފުޅުންނަކީ އެމްޑީޕީން ތާއީދުކުރެއްވި ބޭފުޅުންކަމުގައެވެ. އަދި މި ލިސްޓަށް ވޯޓު ދެއްވުމަށް އެމްޑީޕީގެ ޕާލިމަންޓްރީ ގްރޫޕްގައި ހިމެނޭ ފަސްބޭފުޅުން އެއްބަސްވެފައިވަނީ ޕާޓީއަށް ބެލުމަށްވުރެ ހުށަހެޅިފައިވާ ބޭފުޅުންނަށް ބެއްލުވުމަށްފަހުގައި ކަމަށްވެސް އަފީފް ވިދާޅުވިއެވެ. އެދުވަހު ވޯޓަށް އެހުނު ވަގުތު އެމްޑީޕީގެ ޕާލިމަންޓްރީ ގްރޫޕްގެ އެއްބޭފުޅާ ރީކޯ މޫސާ މަނިކު މިލިސްޓާއި ދެކޮޅު ހެއްދެވި ނަމަވެސް އޭގެ ކުރިން އެބޭފުޅާވެސް މި ލިސްޓަށް ތާއީދު ކުރައްވާފައިވާކަމުގައި އަފީފް ވިދާޅުވިއެވެ. މިދިޔަ ހުކުރު ދުވަހުގެ ރޭ އއ އުކުޅަހުގައި ބޭއްވި ޖަލްސާގައި އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދުވެސް ވަނީ މިހާރު ހޮވިފައިވާ އިލެކްޝަންސް ކޮމިޝަނަރް ތާއީދު ކުރައްވާކަން ހާމަކުރައްވާފައެވެ.

މިނޫސްކޮންފަރެންސްގައި ޗެއާޕާސަން މާރިޔާ ހާމަކުރެއްވި ގޮތުގައި ރާއްޖޭގައި އުފެދޭ ޖުޑިޝަލް ކޮމިޝަންގައި ބޭރުގެ ފަޑިޔާރުން ތިބުމަކީ މައްސަލައެއް ނޫނެވެ. އަދި މީގެ އިތުރަށް ދާދިފަހުން އެމްޑީޕީގެ ކެބިނެޓް އޮފީހުގެ ލެޓާރހެޑްގައި ކުރީގެ އަމީން އާއްމުގެ ނަމުގައި ނެރެފައިވާ ޕްރެސް ރިލީސް އަކީ ދޮގު ޕްރެސް ރިލީސްއެއްކަމަށާއި އަދިއެ މައްސަލަ ތަހުގީގް ކުރުމަށް ފުލުސްއޮފީހަށް ހުށަހަޅާނެކަމުގައިވެސް މާރިޔާ ހާމަކުރައްވާފައިވެއެވެ.