ނ އަތޮޅުގެ ފަސް ރަށަކަށް ޒިޔާރަތްކުރެއްވުމަށްފަހު އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދު (އަންނި) މިއަދު ހަވީރު މާލެވަޑައިގަންނަވާނެއެވެ.

މިޒޔާރަތުގައި ނަޝީދު އަންގާރަ ދުވަހު ފުރަތަމަ ވަޑައިގެންފައިވަނީ ވެލިދޫއަށެވެ. ވެލިދޫއަށް ނަޝީދު ފައިބައިވަޑައިގެންނެވި ވަގުތަކީ ހަވީރު ވަގުތަށްވީނަމަވެސް ވަރަށް ގިނަ ބަޔަކު ކެންޑިޑޭޓްގެ އިސްތިގްބާލަށް ބަނދަރު ސަރަހައްދަށް އައިސްފައިވެއެވެ. ވެލިދޫގެ ރައްޔިތުންނާއި ބައްދަލުކުރެއްވުމަށްފަހު އަންގާރަ ދުވަހުގެރޭ ނަޝީދުވަނީ ހުޅުދޫއަށް ވަޑައިގެންފައެވެ. އަދި އެރޭ 10 އެއް ޖަހަންދެން ހުޅުދޫގެ ގޭގެއަށް ދޮރުން ދޮރަށް ހިންގަވާ ރައްޔިތުންގެ ހާލު ބައްލަވާފައިވެއެވެ. ކެންޑިޑޭޓް ނަޝީދު ރައްޔިތުންނާއި ބައްދަލުކުރެއްވުމަށްޓަކައި އެރޭ 10 ޖެހިއިރު ހުޅުދޫ މޭނާ ސްކޫލުގައި ޖަލްސާއެއް އޮތެވެ. ކެންޑިޑޭޓް ނަޝީދުގެ ރިޔާސީ ފަސްވަޢުދު ރައްޔިތުންނަށް ސާފުކޮށްދެއްވާ މިހާރުގެ ސަރުކާރުން ތަޖުރިބާ ހޯއްދަވައިގެން ވެރިކަމަށް ފައިނަންގަވާފައި ތިއްބެވި ކެންޑިޑޭޓުންގެ ހަގީގަތް ހާމަކޮށްދެއްވި މިޖަލްސާއަށް ވަރަށް ބޮޑު ތަރުޚީބެއް ލިބުނެވެ.

ބުދަދުވަހު ކެންޑިޑޭޓް ވަޑައިގަންނެވީ ފޮއްދޫއަށެވެ. އެއަށްފަހު ކެނދިކުޅުދޫއަށާއި މަނަދޫއަށް ޒިޔާރަތްކުރެއްވާނެއެވެ.